冥想問答

可能我哋大部份人都試過冥想嘅時候好眼瞓，只要坐低幾分鐘，就開始覺得好昏沉，呢個係一個好正常嘅情況。當我哋瞇埋眼睛，暫停接收視覺資訊嘅時候，大腦可以稍為休息，身體亦會慢慢放鬆，甚至進入睡眠狀態。

如果喺冥想過程中瞓著咗，我哋就接受身體真實嘅狀況，原來佢真係好攰，好需要休息。我哋唔需要責備自己，覺得無做好，或者無得益。無論冥想嘅過程中有冇中眼瞓，都係一個好好嘅體驗。

但係我哋要避免養成一冥想就進入睡眠狀態嘅習慣。如果確實常常中眼瞓，可以安排早上起身後，或小休之後進行練習，減少中眼瞓嘅機會。亦都可以喺冥想前，花少少時間俾自己嘅身心安定落嚟，嘗試做簡單嘅呼吸法，或者伸展，作為冥想前嘅步驟，俾自己準備好。

冥想期間，當我哋發現自己好眼瞓嘅時候，我哋可以選擇微微張開眼睛，將視線放喺地下，繼續冥想，中眼瞓嘅情況就會相對減少。另一個對應方法就係全然接受好眼瞓嘅狀態，然後觀察呢個狀態。我哋唔需要對抗佢，反而去觀察吓邊度覺得攰，眼皮有冇下垂，四肢會唔會好沉重，身體有無不自覺向前傾？隨住細心嘅觀察，我哋會慢慢清醒過嚟。而結束冥想後，就要抽多啲時間俾身體好好休息喇。

冥想嘅練習就好似我哋去健身房做 gym 一樣，對身心都有好多好多嘅好處，但唔係做一兩次就可以得到，或者完全體驗到，而係要持續不斷地練習。

要強化肌肉需要每日鍛鍊，要體驗冥想嘅好處都係需要每日練習，但係生活上總有唔同嘅原因，令到我哋想停止練習。可能係太攰、可能係唔夠時間，可能係無空間等等，遇到呢啲情況，我哋可以調整練習時間或者方法，都唔好停止每日練習。例如唔夠時間就做短啲，3 分鐘、5 分鐘，如果冇機會好好咁坐低，就練習正念生活、聽聽頌缽聲等等。

每日做 10 分鐘會比一個禮拜做 1 個鐘更加有效益，堅持每日都將部分時間留俾自己，交俾冥想，寧短勿斷。亦都建議大家搵一個固定嘅時間同空間比自己練習，將冥想列入為每日嘅行程當中。例如朝早起身刷完牙就坐上坐墊開始練習，或者臨瞓前練習咗再去瞓覺，呢啲都係比較容易控制同安排嘅時間。當身體熟悉咗呢一個運作模式嘅時候，就會好自然培養成習慣。

喺冥想期間，當身體安靜落嚟嘅時候，大腦就會好習慣咁開始思前想後，有時係回想過去，有時係計劃未來，或者係天馬行空嘅各種想像。

冥想唔係一個消除雜念嘅練習，而係幫助我哋有更好嘅覺察力，就好似冥想嘅時候，我哋更加容易見到、發現到自己有好多唔同嘅念頭跑出嚟，更加明顯知道，原來思緒係不斷咁遊走喺過去同未來，現實同想像之間。

例如有人會喺冥想期間做一啲計劃，例如練習結束之後要做啲咩，聽日開會要準備咩，結果越諗越焦慮，俾呢啲待辦事項困擾住，我哋可以將呢一啲都視為雜念，一旦發現到，我哋就要放低佢，回歸當下，返到去我哋專注嘅對象上面。冥想嘅練習就係提升我哋呢一方面嘅自我覺察能力，令我哋嘅思緒、目標更加清晰。

喺冥想期間好容易出現各種唔舒服嘅情況，常見嘅有腳痹、腰酸背痛、甚至係個鼻好痕、嘴唇好乾，頭髮吉到塊面，而呢啲唔舒服嘅情況好好容易令我哋有想改變或者調整姿勢嘅反應。

冥想唔係要我哋對唔舒服嘅感覺作出極度忍耐，我哋要練習嘅係減少好自然、好習慣性嘅反應，例如一感覺腳痹就即刻郁吓腳，個鼻好痕就即刻抓吓。

我哋可以嘗試同呢啲唔舒服嘅狀態拉開少少距離，稍稍觀察，對所有不適都採取開放嘅態度，接受佢，留意佢，然後放低佢，嘗試將注意力輕輕帶返到專注對象上。我哋知道冥想期間出現嘅不適感都係短暫，當我哋唔再去放大呢啲感受時，過一陣就會慢慢消失。但係如果唔舒服嘅感覺強烈到我哋無辦法再好好練習，就稍稍調整姿勢，再重新開始。

點解要冥想就同點解要做運動一樣。我哋都知道運動對於身心有好多好處，而冥想其實都一樣。我哋去運動，喺身體層面可以建立肌肉、增加新陳代謝、改善健康，預防疾病，喺心理層面，運動時所釋放嘅腦內啡可以令我哋開心啲、放鬆啲，同時可以減低壓力，提升自信。而冥想係身心嘅調整都非常出色。

冥想可以改變大腦形狀，人類老化會令腦左前額葉皮質變薄，令到記憶力喪失、出現認知障礙。而冥想可以令腦左前額葉皮質變厚，喺認知、情緒處理同幸福感嚟講係非常重要。同時，冥想亦都可以增加腦部灰色物質，令我哋可以有更好嘅注意力、覺察力、以及控制情緒反應嘅能力。

研究指出，持續嘅冥想練習更加可以令杏仁核變細，降低身體壓力反應嘅強度，令我哋無咁大壓力。另外，海馬迴體亦會變大，令我哋有更好嘅學習能力同記憶力。喺醫學研究上，恆常冥想可以提升免疫系統，降低焦慮、憂鬱，減少負面情緒，同時令我哋嘅快樂感同幸福感大大提升。

冥想嘅好處仲有好多好多，同運動一樣，唔係做一次、兩次就可以得到所有好處，要持續不斷地練習，我哋先可以慢慢體驗到。希望我哋都可以持之以恆啦！

喺冥想嘅時候會諗嘢係好自然發生嘅事，可以話係每個人都一定會經歷嘅過程。當我哋靜落嚟嘅時候更加容易察覺到大腦每時每刻都喺度諗嘢。一般，我哋其實好難阻止大腦唔去諗嘢，因為大腦太習慣諗嘢，習慣到好似呼吸咁，咁自然發生。

好多人以為冥想講嘅「喺每一個當下保持平靜」又或者「靜心」即係要我哋唔好諗嘢。冥想唔係要我哋唔諗嘢，而係訓練我哋有清晰嘅思考能力。我哋要學習區分思考同胡思亂想嘅想法，冥想唔係要停止任何思考，而係改變我哋同想法之間嘅關係。如果我哋發現自己喺度思考，我哋就有一個空間去睇到我哋嘅狀態係點，可以選擇要唔要繼續思考落去。

練習冥想可以令我哋想思考時，就思考。唔需要思考時，我哋都唔會喺度胡思亂想。

而冥想係有好多唔同嘅方法同方式，有啲練習係俾我哋諗嘢嘅，有啲練習係俾我哋減少諗嘢嘅，有啲練習係坐喺度嘅，有啲練習係瞓喺度嘅，有動有靜，我哋可以揀適合自己方法，慢慢體驗。